Alarma no usual di Prome Ministro Pisas a bira impacto pa Aruba
*Den temporada di horcan mester evita sensacion climatologico
*Un pais mester ta prepara 365 dia pa aña pa yobida cu strena y lamper
ORANJESTAD (AAN) — Creacion di sensacion cu situacion publico, por tin resultado sumamente serio pasobra na momento cu realmente mester bati alarma na forma urgente, hende ta kere cu ta sin necesidad ta lanza advertencia y no ta tuma medida necesario.
Informacion di tempo ta un ramo sumamente sensibel di periodismo y ta depende di e preparacion di un periodista pa haci su trabou riba e tereno aki pero tambe di Gobierno y tur otro sector.
Informacion di condicionnan di tempo, ta basa riba un cooperacion den nos region, directamente entre e servicionan di tempo di Estados Unidos, manera National Hurricane Center y tur e servicionan meteorologico den e region cu ta produci informacionnan local a base di cual tecnologia cu ta avansa diariamente, ta permiti personal profesional di Meteorologia, prepara boletin di tempo.
Meteorologia ta rekeri un base profesional hopi exigente y tin diferente rangonan den e trabou, di cual bienestar di hende directamente ta depende.
Informacionnan riba condicion di tempo no ta wordo emiti pa causa sensacion, pero pa evita cu comunidadnan y hende ta bira victima di condicionnan peligroso di tempo.
Regla tabata semper, cu ora tin peligro, Gobierno ta wordo avisa si ta papia di un situacion serio y a base di informacion profesional, prepara y presenta pa personal cualifica di Servicio Meteorologico, Pueblo ta wordo informa di cualkier peligro cu ta existi.
Gobierno tin e tarea pa 365 dia pa aña, percura pa Pueblo ta prepara pa confronta cualkier desaroyo peligroso di tempo den estrecho cooperacion cu Comisionnan di Desaster di un pais, cu ta prepara pa actua riba termino corto.
Pa loke ta trata periodismo, tabata tin e acuerdo cu ta tene na loke profesionalnan di e autoridad Meteorolico di e pais presenta, pa informa Pueblo y cu ta evita sensacion peligroso.
Ayera un situacion lamentabel a presenta, ora DIARIO a wordo informa cu Prome Ministro di Curacao, Pisas, a lanza un advertencia pa condicionnan peligroso di tempo.
Un asunto no usual, pasobra ta na Servicio Meteorologico di un pais pa informa Pueblo.
Prome Ministro di Curacao, Pisas, a pidi Pueblo di Curacao prepara pa posibel mal tempo cuminsando for di awe y riba otro dianan di e siman aki.
E noticia rapidamente a alcansa Aruba y DIARIO a comprende imediatamente cu e Prome Ministro di Curacao a basa su mes riba un informacion cu ya tabata conoci for di ultimo fin di siman, por a spera cambionan den condicion di tempo.
Siman pasa y den fin di e siman, por un area di presion halto tabata domina produciendo condicion di poco nubia y cu biento fuerte.
E forsa di biento ya tabata uno di e factornan cu a haci yobida sumamente dudoso. A wordo pronostica algun dia pasa, cu despues di e dianan aki, pues awe, por a spera awacero y posibelmente strena y lamper, causa pa un disturbio na nivelnan mas halto, un through, cu manera DIARIO semper a splica su lectornan tin e tendencia di hala nubianan riba Venezuela den direccion di Aruba.
Uno di e nubianan aki, yama CB, Cumulonimbus, un nubia grandi cu e haltura impresionante, ta productor di awa pisa y di strena y lamper.
Fastioso tabata, cu e Ministro Presidente di Curacao, a referi na e hecho cu a drenta temporada di horcan, cu a crea e sensacion cu e sistema di tempo tabata debi na temporada di horcan mientras ta trata simpelmente di actividad di e zona di Convergencia Intertropical, cu den e temporada aki ya ta percura pa nubia pisa den e region.
Algo normal den e temporada actual pa cual pues mester ta prepara si na cierto partinan yobida pisa por causa problema.
E alarma cu e Prome Ministro di Curacao a bati, tabata tin un efecto sensacional y a alcansa Pueblo di Aruba tambe.
No ta usual pa Prome Ministro di un pais duna informacion cu mester wordo presenta dor di Servicio Meteorologico, ya cu no ta trata di un sistema tropical, manera tormenta of horcan.
Panico a presenta tanto na Curacao y rapidamente na Aruba pa un situacion cu for di awor te inicio di 2025, mester ta prepara ya cu awor ta drenta e asina yama temporada cortico di yobida causa pa sistemanan cu ta alcansa e pais den e temporada aki.
E informacionnan cu a wordo emiti pa Meteorologonan di Aruba, ta cuadra cu e realidad di tempo na Aruba, cu e siman aki por conoce yobida, strena y lamper pero no ta sistemanan pa cual Prome Ministro mester bati alarma grandi, causando asina sensacion pa henter e region, manera ayera tabata e caso.
En todo caso, Prome Ministro Pisas a pone un parti di poblacion di Aruba tambe na careda pa despues Servicio Meteorologico di Curacao anuncia posibilidad di yobida, cu manera den e temporada aki ta usual, strena y lamper e dianan aki.
